Чаҕылхай, дьикти дьылҕалаах биир дойдулаахтарбыт.

Олунньу 23 күнэ – Аҕа Дойдуну көмүскээччилэр күннэринэн бары күүстээх аҥардары эҕэрдэлиибит уонна Семенов Степа 6 кылаас үөрэнээччитэ хомуйан оҥорбут рефератыттан билиһиннэрэбит. 

Чаҕылхай, дьикти дьылҕалаах биир дойдулаахтарбыт.

Хампа оскуолатыгар үлэлээбит, үөрэммит чаҕылхай, дьикти дьылҕалаах дьоммутунан  киэн туттабыт уонна холобур оҥостобут.

                            Степан Филиппович Гоголев

                      (1896-1933)

 1907-1911 сс. Орто Бүлүү Хампа начальнай училищатыгар үөрэммит. Саха сирин юстициятын народнай комиссара, прокурора. Үөрэхтээһин уонна доруобуйа харыстабылын наркома.

                                          

Советскай Союз Геройа

Кондаков Николай Алексеевич

                   (1920-1979)

Хампа ситэтэ суох орто оскуолатын 1936 сыллаахха үөрэнэн бүтэрбит. 1942 сыл Аҕа дойду сэриитигэр ыҥырыллан барыар диэри нуучча тылын учууталынан, кылаас салайааччытынан үлэлээбит. Сэрииттэн 1946 сыллаахха эргиллэн кэлэн учууталлаабыт.

Советскай Союз Геройа, Саха Республикатын культуратын үтүөлээх үлэһитэ, суруналыыстар Емельян Ярославскай аатынан республикатааҕы бириэмийэлэрин лауреата, ССРС Бочуоттаах радиһа.

 Советскай Союз Геройа

Степанов Николай Саввич

            (1922-1992)

Хампа оскуолатыгар үөрэммит, сэрииттэн

1947 с.  төннөн кэлэн интернат воспитателинэн,

сэбиэдиссэйинэн, физкультура учууталынан,

 пионер баһаатайынан оскуолаҕа үлэлээбит.

Советскай Союз Геройа,  Бүлүү улууһун Бочуоттаах олохтооҕо, үлэ, сэрии ветерана, уоттаах сэриигэ ураты хорсун быһыына көрдөрбүт буойун.

Алексеев Михаил Андреевич

                                      ( 1917 – 1995)

Хампа оскуолатыгар 1929 – 1931 сылларга 3, 4 кылааска үөрэммит. 1930 сыллаахха 3 кылаас үөрэнээччитэ Миша Алексеев Саха сиринээҕи пионердар 1 слеттарыгар делегатынан талыллан слет үлэтигэр сылдьыбыт. 1931 сыллаахха 5 кылааска үөрэх сылын бастакы аҥаарыгар үөрэнэ сылдьан, комсомол уобаластааҕы конференциятыгар делегатынан баран, конференция үлэтигэр активнай кыттыыны ылбыт.

ССРС Народнай учуутала, РСФСР уонна Саха АССР үтүөлээх учууталлара.   Үөһээ Бүлүүтээҕи физико-математическай хайысхалаах оскуоланы төрүттээбит.

              Павлов Дмитрий Саввич

             (1916 – 2010)

Дмитрий Саввич Павлов Дьылҕа хаан ыйааҕынан үс төгүл уоттаах сэриигэ кыттан тыыннаах хаалбыт. Ол курдук кини тоҕус сыл устата саллаат сиэрэй синиэлин санныгар кэтэн, биэс төгүл бааһыран туран Улуу Кыайыыны уһансан тапталлаах төрөөбүт дойдутугар эргиллибитэ. 1936 сыллаахха Кыһыл армия кэккэтигэр ыҥыраллар. Сэриигэ бастакы сүрэхтэниитэ Георгий Жуков хамаандатынан Халкин Голга буолар. Онтон иккис сэриитэ Арҕаа фроҥҥа 1941 сылтан 1945 сылга Кыайыы буолуор диэри. Үһүс сэриитигэр Илиҥҥи фроҥҥа ыыталлар. Дойдутугар 1947 сыллаахха Японияны кыайыы кэннэ эргиллэр.

Степанов Тимофей Саввич

           (1917 с. - ...?)

Саха саллаата – Франция партизана.

Бүлүүгэ Орто Бүлүү улууһугар Өргүөт (билиҥҥитэ Арыылаах) нэһилиэгэр Степанов Савва Степанович – Ноосук кыра уола Тимофей Хампа ситэтэ суох орто оскуолатын бүтэрбит.

Степанов Тимофей Саввич көрдөһөн бастакы ыҥырыкка 1941 с. балаҕан ыйын 3 күнүгэр Бүлүүттэн сэриигэ барбыта. 1942 с. сайыныгар госпитальга эмтэ сытан билиэҥҥэ түбэспит. Парижтан хоту Амьен куоракка барар тимир суолга баар Клермон куораттааҕы билиэннэйдэр лааҕырдарыттан Тимофей Саввич 1944 с. ыам ыйын 28 күнүгэр күрээбитэ, 2 хонон баран партизанскай этэрээккэ тиийэн холбоспута. Манна сылдьан кини немецтии, французтуу холкутук кэпсэтэр буолбута. Кыайыы кэннэ Советскай Союзка кэлэн бары бэрэбиэркэни ааспыта. Ийэ дойдутугар туох да буруйа суоҕа чуолкайданан 1947 с. дойдутугар Бүлүүгэ эргиллэн кэлбитэ.